ഏത്തയ്ക്കയ്ക്കും എണ്ണയ്ക്കും വിലകൂടുന്നു: ഉപ്പേരിയുടെ വ്യാജനും വിപണിയില്‍

ഏത്തയ്ക്ക, എണ്ണ എന്നിവക്ക് വില വർധിച്ചത് ഉപ്പേരി വ്യവസായത്തെ പ്രതിസന്ധിയിലാക്കുന്നു. ഒരു മാസത്തിനിടെ ഏത്തയ്ക്കയ്ക്ക് ഇരട്ടിയിലേറെയായി വില. ചിപ്സ് വില കിലോയ്ക്ക് 450ന് അടുത്തെത്തി. വരും ദിവസങ്ങളിൽ ഇനിയും വർദ്ധനവിനാണ് സാദ്ധ്യത.
വയനാട്ടിൽ ഏത്തൻ ഉത്പാദനം കുറഞ്ഞതും ഇന്ധനവില വർദ്ധനവുമാണ് പ്രധാന കാരണം. മേട്ടുപ്പാളയത്തിൽ നിന്നുള്ള ഏത്തയ്ക്കയാണ് ഇപ്പോൾ ചിപ്സിനായി ഉപയോഗിക്കുന്നത്. ഒരുമാസം മുമ്പ് ഏത്തയ്ക്ക കിലോയ്ക്ക് 48 രൂപ ആയിരുന്നപ്പോൾ ചിപ്സ് കിലോഗ്രാമിന് 360 രൂപയായിരുന്നു. ഏത്തൻ വില 70 രൂപയെത്തിയതോടെയാണ് ചിപ്സിന് 400- 420 രൂപയായത്. ഏത്തനൊപ്പം പാമോലിന്റെ വിലയും തൊഴിലാളികളുടെ കൂലിയും വർദ്ധിച്ചത് ചിപ്സിനെയും ബാധിച്ചു. റഷ്യ, മലേഷ്യ എന്നിവിടങ്ങളിൽ നിന്നാണ് പാമോലിൻ ഇറക്കുമതി ചെയ്യുന്നത്. ഉക്രെയ്ന്‍ യുദ്ധത്തെ തുടർന്ന് പാമോലിന്റെ വിലയിൽ വലിയ വർദ്ധനവാണ് ഉണ്ടായത്. സൺഫ്ളവർ ഓയിൽ കിലോയ്ക്ക് 40 രൂപ കൂടി 170 ആയി. വെളിച്ചെണ്ണയുടെ വിലയിൽ കാര്യമായ വർദ്ധനവ് ഉണ്ടായില്ല. എന്നാൽ പാമോലിനെക്കാൾ കൂടുതൽ എണ്ണ ചെലവാകുന്നതിനാലാണ് വെളിച്ചെണ്ണയിൽ വറുക്കുന്ന ചിപ്സിന് വില കൂടാൻ കാരണം. ഒന്നാം തരം ഏത്തന് കിലോയ്ക്ക് 70 രൂപയാണ്. രണ്ടാംതരം ഏത്തൻ 50 രൂപയ്ക്ക് വരെ ലഭിക്കും. ഇതുപയോഗിച്ച് ഉണ്ടാക്കുന്ന ചിപ്സ് കുറഞ്ഞ വിലയ്ക്ക് നൽകാൻ കഴിയുമെന്ന് ചെറുകിട വ്യാപാരികൾ പറയുന്നു. രണ്ടാംതരം കായ കൊണ്ടുണ്ടാക്കുന്ന ചിപ്സ് ഒന്നാം തരം കായയുടെ ഒപ്പം കലർത്തി കൂടിയ വിലയ്ക്ക് വിൽക്കുന്നുണ്ടെന്ന പരാതിയുമുണ്ട്. 

Eng­lish Sum­ma­ry: Prices of oil and rise banana rise: fake chips spreads in the market

You may like this video also