പിന്നോട്ടില്ലെന്ന് ഉറപ്പിച്ച് ശശിതരൂര്‍: പ്രസിഡന്റ് സ്ഥാനത്തേക്ക് മത്സരിക്കണമെന്ന് രാഹുല്‍ ഗാന്ധി ആവശ്യപ്പെട്ടിരുന്നതായും തരൂര്‍

കോണ്‍ഗ്രസ് പ്രസിഡന്റ് സ്ഥാനത്തേയ്ക്ക് മത്സരിക്കണമെന്ന് തന്നോട് രാഹുല്‍ ഗാന്ധി ആവശ്യപ്പെട്ടിരുന്നതായി ശശി തരൂര്‍ എംപി. ശശി തരൂരിന്റെ സ്ഥാനാർത്ഥിത്വം പിൻവലിക്കണമെന്ന് മുതിർന്ന കോൺഗ്രസ് നേതാവ് രാഹുൽ ഗാന്ധിയോട് ചില പാർട്ടി നേതാക്കൾ ആവശ്യപ്പെട്ടിരുന്നതായും ശശി തരൂര്‍ ആരോപിച്ചു.
പാർട്ടിക്ക് ഗുണം ചെയ്യുമെന്നതിനാൽ മത്സരത്തിൽ നിന്ന് പിന്മാറാൻ താൻ ആവശ്യപ്പെടില്ലെന്ന് രാഹുൽ ഗാന്ധി പറഞ്ഞതായി തിരഞ്ഞെടുപ്പ് പ്രചാരണത്തിന്റെ ഭാഗമായി കേരളത്തിലെത്തിയ തരൂർ മാധ്യമപ്രവർത്തകരോട് പറഞ്ഞു.
‘പാർട്ടി അധ്യക്ഷ സ്ഥാനത്തേക്ക് മത്സരിക്കണമെന്ന് കഴിഞ്ഞ 10 വർഷമായി താൻ പറയുന്നുണ്ടെന്ന് അദ്ദേഹം (രാഹുല്‍ ഗാന്ധി) എന്നെ ഓർമ്മിപ്പിച്ചു. ഞാൻ പിന്മാറേണ്ടെന്നും തിരഞ്ഞെടുപ്പിൽ മത്സരിക്കണമെന്നും അദ്ദേഹം പറഞ്ഞു.”
വലിയ നേതാക്കൾ പിന്തുണയ്ക്കുമെന്ന് താൻ ഒരിക്കലും പ്രതീക്ഷിച്ചിരുന്നില്ലെന്നും ഇപ്പോഴും പ്രതീക്ഷിക്കുന്നില്ലെന്നും അതേസമയം എല്ലാവരുടെയും പിന്തുണ തനിക്ക് ആവശ്യമാണെന്നും അദ്ദേഹം പറഞ്ഞു.
പാർട്ടി അധ്യക്ഷ സ്ഥാനത്തേക്ക് മുതിർന്ന നേതാവ് മല്ലികാർജുൻ ഖാർഗെയ്ക്ക് പിന്തുണ പ്രഖ്യാപിച്ച് കേരള പ്രദേശ് കോൺഗ്രസ് കമ്മിറ്റി (കെപിസിസി) പ്രസിഡന്റ് കെ സുധാകരൻ പരസ്യമായി രംഗത്തെത്തിയതിന് പിന്നാലെയാണ് പ്രസ്താവന. തിരഞ്ഞെടുപ്പിൽ നിന്ന് പിന്മാറി തന്റെ ഈ ശ്രമത്തിൽ ഇതുവരെ പിന്തുണച്ചവരെ ഒറ്റിക്കൊടുക്കില്ലെന്നും തരൂർ പറഞ്ഞു.
നാഗ്പൂരിലും വാർധയിലും പിന്നെ ഹൈദരാബാദിലും പാർട്ടി പ്രവർത്തകര്‍ അധ്യക്ഷ സ്ഥാനത്തേയ്ക്ക് മത്സരിക്കണമെന്ന് തന്നോട് അഭ്യര്‍ത്ഥിച്ചിരുന്നതായും പിന്നോട്ടില്ലെന്നും തരൂര്‍ കൂട്ടിച്ചേര്‍ത്തു.
തന്റെ അനുയായികളിൽ ഭൂരിഭാഗവും യുവ പാർട്ടി നേതാക്കളും പാർട്ടി പ്രവർത്തകരുമാണ്, എന്നാൽ തനിക്ക് എല്ലാവരുടെയും പിന്തുണ ആവശ്യമാണെന്നും ആരെയും വിലകുറച്ച് കാണുന്നില്ലെന്നു അദ്ദേഹം പറഞ്ഞു. കോൺഗ്രസ് പ്രസിഡന്റ് തിരഞ്ഞെടുപ്പിന്റെ വോട്ടെടുപ്പ് ഒക്ടോബർ 17 ന് നടക്കും. വോട്ടെണ്ണൽ ഒക്ടോബർ 19 ന് ആരംഭിച്ച് അന്നുതന്നെ ഫലം പ്രഖ്യാപിക്കും. 9,000ലധികം പ്രദേശ് കോൺഗ്രസ് കമ്മിറ്റി (പിസിസി) പ്രതിനിധികൾ വോട്ടെടുപ്പിൽ വോട്ട് ചെയ്യും. 

Eng­lish Sum­ma­ry: Shashi Tha­roor said that Rahul Gand­hi had asked him to run for the post of President

You may like this video also