ആർഭാട ജീവിതം നടത്തുന്നതിനായി മോഷണം നടത്തിയ കൗമാര കാരെ ഉടുമ്പൻചോല പൊലീസ് പിടികൂടി. ഞായറാഴ്ച രാത്രി 11 മണിയോടെ സംഭവം നടന്നത്. ഉടുമ്പഞ്ചോല ടൗണിലെ സെന്റ് മേരീസ്‌ സ്പയർ പാർട്സ് കടയിൽ മോഷണം നടത്തിയ ഉടുമ്പൻചോല നിവാസികളായ എം എസ് കോളനിയിലെ സൂര്യ (19), കഞ്ഞിക്കലയം കോളനിയിലെ ഗോകുലം വീട്ടിൽ ഗോകുൽ കൃഷ്ണൻ (20), കഞ്ഞിക്കലയം കോളനിയിൽ അങ്കാളീശ്വരൻ (21) മേട്ടകിൽ കോളനിയിൽ അരുൺകുമാർ (19) എന്നിവരെയാണ് പൊലീസ് അറസ്റ്റ് ചെയ്തത്.

കോളനിയ്ക്ക് സമീപം പ്രവർത്തിക്കുന്ന കടയുടെ പിൻവശത്തെ വാതിൽ കുത്തി തുറന്ന് അകത്ത് പ്രവേശിക്കുകയും മേശയിൽ ഇരുന്ന 5,110 രൂപ എടുക്കുകയും ചെയ്തു. ഇതിനെ തുടർന്ന് ഇടുക്കി ഡോഗ് സ്‌ക്വാഡ്, ഫിംഗർ പ്രിന്റ് എക്സ്പർട്ട് എന്നിവ സ്ഥലത്തെത്തി പരിശോധന നടത്തി. സമീപത്തുള്ള വ്യാപാര സ്ഥാപനത്തിലെ സിസിടിവി ദൃശ്യങ്ങളുടെ അടിസ്ഥാനത്തിൽ നടത്തിയ അന്വേഷണത്തിലാണ് കോളനി നിവാസികളായ പ്രതികളെ കുറിച്ചുള്ള സൂചന ലഭിച്ചത്. ഇതിനെ തുടർന്ന് കസ്റ്റഡിയിൽ എടുത്തു ചോദ്യം ചെയ്തപ്പോൾ പ്രതികൾ കുറ്റം സമ്മതിക്കുകയായിരുന്നു.

ഒന്നാം പ്രതി സൂര്യയുടെ വീട്ടിൽ നിന്നും 610 രൂപയും രണ്ടാം പ്രതി ഗോകുലിന്റെ വീട്ടിൽ നിന്നും 4,500 രൂപയും കണ്ടെടുത്തു. രണ്ട് വീടുകളിൽ നിന്നുമായി കാണാതായ 5,110 രൂപയും ഉടുമ്പഞ്ചോല എസ് എച്ച്ഒ അബ്ദുൽഖനിയുടെ നേതൃത്വത്തിൽ എസ് ഐമാരായ ഷാജി എബ്രഹാം, ഷിബു മോഹൻ. എസ് സിപിഒ സുരേഷ് ബാബു എന്നിവരുടെ സംഘം കണ്ടെടുത്തു. പ്രതികളെ നെടുംകണ്ടം കോടതിയിൽ ഹാജരാക്കി റിമാൻഡ് ചെയ്തു.

English Summary: Theft to live a lavish life: Three arrested