ജര്‍മ്മനിയില്‍ ഭീമന്‍ അക്വേറിയം പൊട്ടിത്തെറിച്ചു. 1,500 വിദേശ മത്സ്യങ്ങളുള്ള സിലിണ്ടർ രൂപത്തിലുള്ള അക്വേറിയമാണ് പൊട്ടിത്തെറിച്ചത്.ഇവിടത്തെ പ്രധാന വിനോദസഞ്ചാര കേന്ദ്രത്തില്‍ സ്ഥാപിച്ചിരുന്നതാണിത്. ഒരു മ്യൂസിയം, കടകൾ, റെസ്റ്റോറന്റുകൾ എന്നിവ ഉൾക്കൊള്ളുന്ന ഡോം അക്വേറിയ സമുച്ചയത്തിലാണ് അപകടമുണ്ടായത്. 14 മീറ്റർ ഉയരത്തിലാണ് അക്വേറിയം സ്ഥിതിചെയ്യുന്നത്. സംഭവത്തില്‍ രണ്ട് പേർക്ക് നിസാര പരിക്കേറ്റിട്ടുണ്ടെന്നും കെട്ടിടാവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ കണ്ടെത്താൻ രക്ഷാപ്രവര്‍ത്തനങ്ങള്‍ തുടരുന്നതായും ബെർലിൻ അഗ്നിശമനസേന അറിയിച്ചു.

കെട്ടിടത്തിൽ നിന്ന് വലിയ അളവിൽ വെള്ളം ഒഴുകിയെത്തിയതിനാൽ അലക്സാണ്ടർപ്ലാറ്റ്സിൽ നിന്ന് ബെർലിനിലെ ബ്രാൻഡൻബർഗ് ഗേറ്റിലേക്ക് പോകുന്ന സമുച്ചയത്തിന് അടുത്തുള്ള ഒരു പ്രധാന റോഡ് അടച്ചു. കോംപ്ലക്‌സിന് പുറത്തുള്ള റോഡും നടപ്പാതകളും മാലിന്യങ്ങൾ കൊണ്ട് നിറഞ്ഞിരുന്നു.

അതികഠിനമായ തണുപ്പാണ് അക്വേറിയം പൊട്ടിത്തെറിക്കാനുള്ള കാരണമെന്നാണ് പ്രാഥമിക നിഗമനം. കാരണം ഇപ്പോഴും അന്വേഷിക്കുകയാണെന്ന് പോലീസ് പറഞ്ഞു.80 വ്യത്യസ്ത ഇനങ്ങളിലുള്ള 1,500 ഉഷ്ണമേഖലാ മത്സ്യങ്ങളെ ഉൾക്കൊള്ളുന്ന ലോകത്തിലെ ഏറ്റവും വലിയ സിലിണ്ടർ ടാങ്ക് അക്വേറിയത്തിലുണ്ടെന്ന് ഓപ്പറേറ്റർമാർ പറയുന്നു. 2020ൽ അവസാനമായി നവീകരിച്ച അക്വേറിയം ബെർലിനിലെ ഒരു വലിയ വിനോദസഞ്ചാര കേന്ദ്രമാണ്. ടാങ്കിലൂടെയുള്ള 10 മിനിറ്റ് എലിവേറ്റർ യാത്രയാണ് ഇവിടുത്തെ പ്രധാന ആകർഷണങ്ങളിലൊന്ന്.

English Summary: Aquarium at tourist resort explodes, injuring two, trapping several tourists