ഓട്ടോ കൂലി ചോദിച്ചതിന് ഡ്രൈവറെ കുത്തിക്കൊലപ്പെടുത്താൻ ശ്രമിച്ച കേസിൽ പ്രതിക്ക് പത്ത് വർഷം കഠിന തടവും പിഴയും. നെയ്യാറ്റിൻകര കരമന മേലൻകോട്ടുപുത്തൻ കിരൺ (40)നെയാണ് കോഴിക്കോട് ഒന്നാം അഡീഷണൽ ഡിസ്ട്രിക്ട് ആൻഡ് സെഷൻസ് കോടതി ശിക്ഷിച്ചത്. അറുപതിനായിരം രൂപയാണ് പിഴയൊടുക്കേണ്ടത്. പിഴ സംഖ്യ പരിക്കേറ്റയാൾക്കാണ് നൽകേണ്ടതാണ്. പിഴ ഒടുക്കാത്തപക്ഷം ഒരുവർഷവും മൂന്നു മാസവും അധിക തടവ് അനുഭവിക്കണം.
2013 ഒക്ടോബർ ആറിനായിരുന്നു കേസിനാസ്പദമായ സംഭവം. കോഴിക്കോട് റെയിൽവേ സ്റ്റേഷൻ പരിസരത്ത് നിന്നും രാത്രി സലിമിന്റെ ഓട്ടോ വിളിച്ച് കേസിലെ ഒന്നാം പ്രതി കിരണും രണ്ടാം പ്രതി സുരേഷും കണ്ണാടിക്കലിലേക്ക് പോവുകയായിരുന്നു. കണ്ണാടിക്കൽ ബസാറിനടുത്തുള്ള കനാലിനു സമീപം വെച്ച് ഓട്ടോ കൂലി ചോദിച്ചതിനുള്ള വിരോധം വെച്ച് കിരൺ ഓട്ടോ ഡ്രൈവറായ സലീമിനെ കുത്തി പരിക്കേൽപ്പിക്കുകയായിരുന്നു. പ്രതികളെ ഉടൻ തന്നെ അറസ്റ്റ് ചെയ്തിരുന്നുവെങ്കിലും ജാമ്യത്തിലിറങ്ങി ഒളിവിൽ പോവുകയായിരുന്നു. ശേഷം സമീപകാലത്താണ് കിരൺ പിടിയിലായത്. രണ്ടാം പ്രതി സുരേഷ് വട്ടപ്പാറ എന്നയാൾ നിലവിൽ ഒളിവിലാണ്. ചേവായൂർ പൊലീസ് ഇൻസ്പെക്ടർ പ്രകാശൻ പടന്നയിലാണ് കേസ് അന്വേഷിച്ച് കുറ്റപത്രം സമർപ്പിച്ചത്.
പ്രോസിക്യൂഷൻ 13 സാക്ഷികളെ വിസ്തരിക്കുകയും 19 രേഖകളും മൂന്ന് തൊണ്ടിമുതലുകളും ഹാജരാക്കുകയും ചെയ്തു.പ്രോസിക്യൂഷനുവേണ്ടി അഡീഷണൽ പബ്ലിക് പ്രോസിക്യൂട്ടർ ജോജു സിറിയക്ക്, അഡ്വ മുഹസിന കെ എന്നിവർ ഹാജരായി.
English Summary:Attempt to kill auto driver; Defendant faces up to 10 years in prison and a fine
You may like this video also
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.