കേന്ദ്ര ബജറ്റിൽ പതിവുപോലെ ബിജെപി ഭരിക്കുന്ന സംസ്ഥാനങ്ങള്ക്ക് വലിയ നേട്ടം. കിഴക്കൻ ഇന്ത്യയുടെ വികസന കുതിപ്പിന് ഊന്നൽ നൽകിക്കൊണ്ട് ഒഡിഷയിൽ 20 പുതിയ ഉൾനാടൻ ജലപാതകൾ പ്രവർത്തനസജ്ജമാക്കുമെന്ന് ബജറ്റിൽ നിര്മ്മല സീതാരാമന് പ്രഖ്യാപിച്ചു.
ഒഡിഷയെ രാജ്യത്തിന്റെ കിഴക്കൻ മേഖലയിലെ ഒരു പ്രധാന സാമ്പത്തിക കേന്ദ്രമാക്കി മാറ്റാനാണ് ബജറ്റ് ലക്ഷ്യമിടുന്നത്. ടൂറിസം, പുരാവസ്തു സംരക്ഷണം എന്നിവയ്ക്ക് പുറമെ റെയര് എർത്ത് കോറിഡോറിന്റെ ഭാഗമായുള്ള നിക്ഷേപങ്ങളും സംസ്ഥാന വികസനത്തിന് ആക്കം കൂട്ടും. ഒഡിഷയിലെ ദേശീയ ജലപാത 5 മുതൽ താൽച്ചർ, അങ്കുൾ എന്നീ ധാതു സമ്പന്ന പ്രദേശങ്ങളും കലിംഗനഗർ പോലുള്ള വ്യാവസായിക കേന്ദ്രങ്ങളും പാരദീപ്, ധമ്ര തുറമുഖങ്ങളുമായി ബന്ധിപ്പിക്കുമെന്നും അവർ പറഞ്ഞു. പടിഞ്ഞാറൻ ഗുജറാത്തിലെ സൂററ്റിനെ കിഴക്കൻ ബംഗാളിലെ ദങ്കുനിയുമായി ബന്ധിപ്പിക്കുന്ന പുതിയ സമർപ്പിത ചരക്ക് ഇടനാഴി ഒഡിഷ വഴിയും കടന്നുപോകുമെന്നും ബജറ്റില് പ്രഖ്യാപനമുണ്ട്.
ഏറ്റവും കൂടുതൽ ഏറ്റവും വലിയ പദ്ധതികൾ പ്രഖ്യാപിക്കപ്പെട്ട സംസ്ഥാനങ്ങളിലൊന്ന് ഉത്തർപ്രദേശാണ്. പ്രധാനമന്ത്രി നരേന്ദ്ര മോഡിയുടെ മണ്ഡലമായ വാരണാസി ഉള്പ്പെടെ പൂർവാഞ്ചൽ മേഖലയുടെ വികസനത്തിനായും നിരവധി പുത്തന് പദ്ധതികളും ധന സഹായവുമാണ് പ്രഖ്യാപിച്ചിരിക്കുന്നത്. സംസ്ഥാനത്തെ 25 നഗരങ്ങളെ നഗര വികസനത്തിന്റെ പരിധിയിൽ കൊണ്ടുവരിക എന്ന ലക്ഷ്യത്തോടെയാണ് പ്രഖ്യാപനം.
വാരണാസിയിൽ കപ്പൽ റിപ്പയർ ഇക്കോസിസ്റ്റം, റിങ് റോഡ് ഹൈബ്രിഡ് റെയിൽ കോറിഡോർ, ഡൽഹി–വാരണാസി അതിവേഗ റെയിൽ പാത എന്നിവയാണ് പ്രധാന പ്രഖ്യാപനങ്ങൾ. ലഖ്നൗവിൽ എഐ സിറ്റിയും രാജ്യത്തെ ആദ്യ സെമികണ്ടക്ടർ ഡിസൈൻ ആന്റ് മാനുഫാക്ചറിങ് പാർക്കും സ്ഥാപിക്കും. സ്ത്രീകൾക്കായി ‘ശ്രീ മാർട്ട്’, ഹോസ്റ്റൽ സൗകര്യങ്ങൾ എന്നിവയും പ്രഖ്യാപിച്ചു. കൂടാതെ, പ്രാദേശിക കണക്റ്റിവിറ്റിയും ലോജിസ്റ്റിക്സും മെച്ചപ്പെടുത്തുന്നതിനായി യുപിയിൽ 1,500 കിലോമീറ്റർ ദൈർഘ്യമുള്ള രണ്ട് അതിവേഗ റെയിൽ ഇടനാഴികൾ ഉണ്ടാകും. രണ്ടും വാരണാസിയിലൂടെ കടന്നുപോകും. അഞ്ച് ലക്ഷത്തിലധികം ജനസംഖ്യയുള്ള ടയർ 2, ടയർ 3 നഗരങ്ങളെ സാമ്പത്തിക വളർച്ചയുടെ കേന്ദ്രങ്ങളായി മാറ്റുന്നതിനും മുൻഗണന നൽകുമെന്നും ധനമന്ത്രി പ്രഖ്യാപിച്ചു. ഇതുപ്രകാരം പദ്ധതിയുടെ പ്രധാന ഗുണഭോക്താവ് യുപിയായിരിക്കും.
ഇന്ത്യയിലെ ഏറ്റവും ജനസംഖ്യയുള്ള സംസ്ഥാനമായ യുപിയിൽ അഞ്ച് ലക്ഷത്തിലധികം ആളുകൾ താമസിക്കുന്ന 25 നഗരങ്ങളുണ്ട്. തലസ്ഥാനമായ ലഖ്നൗവിന് പുറമേ, കാൺപൂർ, നോയിഡ, ഗാസിയാബാദ്, വാരണാസി, ഗോരഖ്പൂർ, പ്രയാഗ്രാജ്, സഹാറൻപൂർ, മൊറാദാബാദ്, അലിഗഡ്, അയോധ്യ എന്നിവ ഇതിൽ ഉൾപ്പെടുന്നു. അടിസ്ഥാന സൗകര്യങ്ങളിലെ പുരോഗതി ഈ പ്രദേശങ്ങൾക്ക് ഗണ്യമായ പ്രയോജനം നൽകുമെന്ന് പ്രതീക്ഷിക്കുന്നു.
സംസ്ഥാനത്തുടനീളമുള്ള റെയിൽ, നഗരങ്ങൾ, വ്യവസായം, ആരോഗ്യം, ടൂറിസം എന്നിവയ്ക്കായി വലിയ പദ്ധതികൾ ബജറ്റിൽ ഉൾപ്പെടുത്തിയിട്ടുണ്ട്. വാരണാസിയിൽ ഒരു കപ്പൽ അറ്റകുറ്റപ്പണി തുറമുഖം നിർമ്മിക്കുകയും രണ്ട് പുതിയ അതിവേഗ റെയിൽ ഇടനാഴികളിൽ സ്ഥാപിക്കും അഞ്ച് ലക്ഷത്തിലധികം ജനസംഖ്യയുള്ള ഇരുപത്തിയഞ്ച് യുപി നഗരങ്ങളിൽ പ്രധാന അടിസ്ഥാന സൗകര്യ നവീകരണം നടത്തുമെന്നും ബജറ്റില് പ്രഖ്യാപനമുണ്ട്.
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.