കേരളത്തനിമയും, വിവിധ ഗ്രാമീണ പ്രാദേശികതയും സംഗമിക്കുന്ന നിത്യപരിചിതരായ കഥാപാത്രങ്ങളിലൂടെ മലയാളികളുടെ മനംകവർന്ന മലയാളത്തിന്റെ മഹാനടിയായ കെ പി എ സി ലളിതയുടെ നിര്യാണത്തിൽ നവയുഗം സാംസ്ക്കാരികവേദി അനുശോചിച്ചു. നൂറുകണക്കിന് നാടകങ്ങളിലൂടെ നേടിയ അഭിനയസമ്പത്തുമായാണ് മലയാളസിനിമയുടെ ലോകത്ത് അവർ കടന്നു ചെന്നത്. ലളിതവും അനായാസവുമായ അഭിനയശൈലിയായിരുന്നു കെ പി എ സി ലളിത എന്ന അഭിനേതാവിനെ എന്നും വ്യത്യസ്തയാക്കിയത്. കാണുന്നത് അഭിനയമാണ് എന്ന് അല്പംപോലും തോന്നിപ്പിക്കാതെ, കഥാപാത്രങ്ങളെ ആഴത്തിൽ അനുഭവിപ്പിച്ചു പ്രേക്ഷകനെ മയക്കുന്ന മഹാനടിയായിരുന്നു അവർ. അറുന്നൂറോളം ചിത്രങ്ങളിൽ അഭിനയിച്ചപ്പോഴും, ഓരോ കഥാപാത്രവും മറ്റൊന്നിൽ നിന്നും വ്യത്യസ്തമാക്കാൻ ആ സൂക്ഷ്മ അഭിനയശൈലിയിലൂടെ അവർക്ക് കഴിഞ്ഞു.
ദന്തഗോപുരവാസിയായ സിനിമാതാരം ആകാതെ, എന്നും കമ്മ്യുണിസ്റ്റ് പ്രസ്ഥാനങ്ങളുടെ സഹചാരിയായി സാമൂഹ്യസാംസ്‌ക്കാരിക മേഖലകളിലും കെ പി എ സി ലളിത നിറഞ്ഞു നിന്നു.
കേരള സംഗീത നാടക അക്കാദമിയുടെ ആദ്യത്തെ വനിതയായ അധ്യക്ഷയായി സ്‌തുത്യർഹമായ പ്രവർത്തനം അവർ കാഴ്ച വെച്ചിട്ടുണ്ട്. സഹനടിയ്ക്കുള്ള രണ്ടു ദേശീയ അവാർഡും, നാല് സംസ്ഥാന അവാർഡും, മറ്റനേകം അവാർഡുകളും നേടിയിട്ടുള്ള കെ പി എ സി ലളിത ഏറ്റവും വിലമതിച്ചത്, സാധാരണ പ്രേക്ഷകർ വീട്ടിലെ ഒരംഗത്തെപ്പോലെക്കണ്ടു അവർക്ക് നൽകിയ സ്നേഹത്തെയായിരുന്നു. കാലത്തിന്റെ അനിവാര്യമായ ഒഴുക്കിൽപ്പെട്ടു കെ പി എ സി ലളിത വിടവാങ്ങുമ്പോൾ, അവസാനിയ്ക്കുന്നത് മലയാള സിനിമയിലെ അഭിനയമികവിന്റെ ഒരു യുഗമാണ്. പ്രേക്ഷകർ ഏറ്റെടുത്ത ഒട്ടേറെ കഥാപാത്രങ്ങളിലൂടെ അവരുടെ ഓർമ്മകൾ എന്നും മലയാളി മനസ്സുകളിൽ ഉണ്ടാകുമെന്ന് നവയുഗം കേന്ദ്രകമ്മിറ്റി അനുശോചനസന്ദേശത്തിൽ പറഞ്ഞു.
English Summary: Navayugom condoles on Lalitha’s
You may like this video also
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.