ഭാവാധിക്യം കൊണ്ട്
തകർന്നു പോകുന്നുണ്ട്
മറവിയുടെ രൂപഭദ്രത
മൂന്നക്ഷരത്തിൽ
തങ്ങിനിൽക്കാതെ
ഊർന്നു വീഴുന്നു അർഥങ്ങൾ
ഭൂതത്തെ അപ്പാടെ തകർത്ത്
ജീവിച്ചിരിക്കെ നമ്മെ ചരിത്രമാക്കും
മറവി
മറന്നുപോയെ, ന്ന് കൈമലർത്തുന്ന -
നിസ്സഹായത
കൂട്ടത്തിൽ നിന്ന് ഒറ്റപ്പെടുത്തും
ഓർമ്മിക്കാനുള്ളതില്ലെന്ന്
ചുരുങ്ങിപ്പോകും നമ്മൾ
ഒരൊറ്റ മറവിയിൽ
ഉയരത്തിലെ ഒരു കസേര
എന്നേയ്ക്കും കൈവിട്ടിരിക്കും
മറക്കുമോ? എന്നാകുമ്പോൾ
ഉള്ളകം ഉൽകണ്ഠയിൽ
നീറുന്നുണ്ടാകും
മറക്കണം എന്ന ശാസനയിൽ
ആദ്യം ഇരയും പിന്നെ
വേട്ടക്കാരനും വേവും
മറക്കാം എന്ന് വാക്കിടറി
കണ്ണടച്ച് കൈകൂപ്പി
നെടുവീർപ്പിടാം
കാലത്തോടും വിധിയോടും
സമരസത്തിലാകാൻ
മറക്കില്ല എന്നത്
ഒരു ഉറപ്പാണ്
മനസ്സുകളുടെ ഉടമ്പടിയാണ്
പ്രതീക്ഷയുടെ വെളിച്ചത്തിൽ
കാത്തിരിപ്പിന്റെ
കൂടാരത്തിന്
കാവലാകുന്ന
ഉറപ്പ്
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.