ലക്ഷ്മണരേഖ

ലക്ഷ്മണരേഖകളൊക്കെ
സാങ്കല്പികങ്ങളാണ്
യഥാർത്ഥ പ്രതിബിംബം
ഉണ്ടാക്കാത്തതിനാൽ
സ്ക്രീനിൽ പതിപ്പിക്കാനാവില്ല
എപ്പോഴും
കുത്തി നോവിക്കുന്നില്ലെന്ന് കരുതി
ചത്തുപോയെന്ന് കരുതരുത്
തൊണ്ടയ്ക്ക് കുടുങ്ങിപ്പോയ
മീൻമുള്ള് പോലെ
ഇറക്കാൻ ശ്രമിക്കുമ്പോൾ മാത്രം
അവിടെയുണ്ടെന്ന്
ഓർമിപ്പിച്ചുകൊണ്ടിരിക്കും
കാലമൊഴുകിയ തിണർപ്പുകളിലൊക്കെ
വേർതിരിക്കാനാവാത്തവർ
അലിഞ്ഞു ചേർന്നിട്ടുണ്ടാവും
തലങ്ങും വിലങ്ങും
നെയ്തിട്ടിരിക്കുന്നവ
വർത്തമാനത്തിന്റെ
ആസക്തികൾക്കിടയിൽ
ദൃഷ്ടിഗോചരമാവാനിടയില്ല
നാടുകടത്തപ്പെടാനും
നാളിതുവരെ സ്വന്തമായിരുന്ന
നാട്ടുരാജ്യങ്ങളൊക്കെ
അന്യാധീനപ്പെടാനും
കാക്കക്കാലിന്റെ തണലുപോലുമില്ലാതെ
തളച്ചിടപ്പെടാനും
തയ്യാറുള്ളവർ മാത്രമേ
മുറിച്ചുകടക്കാനൊരുങ്ങാവൂ!