സിറ്റി കോർപ്പറേഷൻ വർക്കേഴ്സ് യൂണിയൻ (എഐടിയുസി) നേതൃത്വത്തില്‍ കേന്ദ്ര സാഹിത്യ അക്കാദമി അവാർഡ് ജേതാവും പ്രശസ്ത കവിയും ഗാനരചയിതാവുമായ പി കെ ഗോപിയെ ആദരിച്ചു. ഈ മാസം 16 മുതൽ 20 വരെ ആലപ്പുഴയിൽ നടക്കുന്ന എഐടിയുസി ശതാബ്ദി ദേശീയ സമ്മേളനത്തോടനുബന്ധിച്ച് വിവിധ മേഖലകളിലെ പ്രതിഭകളെ ആദരിക്കുന്നതിന്റെ ഭാഗമായാണ് ആദരിക്കല്‍ ചടങ്ങ് സംഘടിപ്പിച്ചത്.

കോഴിക്കോട് കെ എം കുട്ടികൃഷ്ണന്‍ സ്മാരക എഐടിയുസി ഹാളില്‍ നടന്ന ആദരിക്കൽ ചടങ്ങ് എഐടിയുസി സംസ്ഥാന വൈസ് പ്രസിഡന്റ് കെ ജി പങ്കജാക്ഷൻ ഉദ്ഘാടനം ചെയ്തു. സിപിഐ സംസ്ഥാന എക്സിക്യൂട്ടീവ് അംഗം ടി വി ബാലൻ അധ്യക്ഷത വഹിച്ചു. കെ മഹേശ്വരി പ്രശസ്തിപത്രം വായിച്ചു. പി കെ ഗോപിക്ക് കെ ജി പങ്കജാക്ഷന്‍ ഉപഹാരം നല്‍കി. എഐടിയുസി ജില്ലാ സെക്രട്ടറി പി കെ നാസർ, അനില്‍ മാരാത്ത്, എം എ ബഷീര്‍, ഡോ. ജെറീഷ്, ബാബു ഒലിപ്രം, പി വി മാധവൻ, പ്രൊഫ. ടി കെ രാമകൃഷ്ണൻ, സി പി സദാനന്ദൻ, കെ ജയപ്രകാശ്, ബൈജു മേരിക്കുന്ന്, എം ബഷീർ എന്നിവർ ആശംസ അര്‍പ്പിച്ച് സംസാരിച്ചു. പി കെ ഗോപി മറുപടി പ്രസംഗം നടത്തി. വി ടി ഗോപാലൻ സ്വാഗതവും ടി വി ബാബു നന്ദിയും പറഞ്ഞു.

English Summary: AITUC National Conference; Poet PK Gopi was honored