ഉദിക്കാതായ പകലിനെ
പാൽക്കാരനും പത്രക്കാരനുമായിരിക്കും ആദ്യം കണ്ടുമുട്ടുക
അതോ രാത്രിയെ കമിഴ്ത്തി മൂടി
ഉറങ്ങാൻ പോയ പെണ്ണുങ്ങളോ …?
സൂര്യനെ കാത്തിരുന്ന് മുഷിഞ്ഞ ആളുകൾ ഓരോ നക്ഷത്രങ്ങളെ എടുത്ത് വേലയ്ക്കുപോകും .
പെണ്ണുങ്ങൾക്ക് വേറെ നക്ഷത്രങ്ങൾ ഉണ്ടാകുമോ?
ഭാരം കുറഞ്ഞ… തിളക്കം കുറഞ്ഞ… ഊർജ്ജം കുറഞ്ഞ…
എന്റെ നക്ഷത്രം കെട്ടു പോയെന്ന് അവൾ ആവലാതിപ്പെടുമ്പോൾ ഒരുപാട് ആണുങ്ങൾ അവരുടെ നക്ഷത്രങ്ങളെ അവൾക്ക് നീട്ടും
വിയർത്ത ചുണ്ടിന്നാഴങ്ങളിൽ,
അരക്കെട്ടിൽ, മുലയിടുക്കിൽ പിൻകഴുത്തിൽ, തുടപ്പുറത്തും ,
ഉടൽ ചുരുളുകളിലെല്ലാം ജ്വലന നക്ഷത്രങ്ങൾ ..
അപ്പോഴവൾ ഒരു ആകാശമാകും നക്ഷത്രങ്ങളുടെ ആകാശ ദ്വീപ്
ആണുങ്ങൾ വെളിച്ചപ്പെടുത്തിയ നക്ഷത്ര ദ്വീപ്..
പക്ഷേ മറ്റൊന്നും തിരിച്ചു ചോദിക്കാത്ത
ആ ഒറ്റ നക്ഷത്രത്തെ എന്നാണ് അവൾക്ക് കിട്ടുക…?
ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.