March 31, 2023 Friday

സുഭദ്രം

ജയപ്രകാശ് എറവ്
January 29, 2023 2:15 pm

എല്ലാം സുഭദ്രം
പുറത്ത് നിന്നു പൂട്ടി
തുറക്കുവാനൊരു
താക്കോലും കരുതി
പുറത്തേക്ക് പോകും നേരം
പറഞ്ഞു വച്ചു ഞാൻ
പ്രിയ ചങ്ങാതികളോട്
തൊടിയിലെ
മുക്കുറ്റി കാശിത്തുമ്പ
വാലാട്ടിപക്ഷി അണ്ണാറക്കണ്ണൻ
ചകോരം ഒറ്റമൈന
ഏവരും സാക്ഷി
അവർ കാക്കും
ഉറക്കത്തിലാഴ്ന്ന കൊച്ചുവീടിനെ
മുറിയ്ക്കുള്ളിലാരുമില്ലെന്ന
തോന്നൽ വേണ്ട
ഉണ്ട്,
പ്രിയപ്പെട്ടവർ അതിനുള്ളിൽ
ഉറക്കം കെടുത്തും ഒട്ടേറെ പേർ
പുറത്ത് നിന്ന് വരുംനേരം
കാൽപെരുമാറ്റമൊന്ന് കേട്ടാൽ മതി
കയറിയൊളിക്കും
പുസ്തകത്താളിൽ.
വർഷങ്ങളുടെ കനം
തീർത്ത് തീർത്ത് ഞാനിപ്പോൾ
ജന്മാന്തര പുണ്യം നേടുന്നത്
അവരിലൂടെ
പൂട്ടി പോകുന്നത്
ആധികൊണ്ട് തന്നെ
പുതിയവർക്കായ്
പണി തീർത്തയിടത്ത് നിന്ന്
കലഹപ്രിയർ ഓടി കയറും
പിന്നെ ചർച്ചയാകും
തെറ്റും ശരിയും ഏറ്റുമുട്ടും
സമാധാനം അതല്ലേ
തമ്മിൽ ഭേദം
സമാന്തരരേഖയിലൂടെയുള്ള യാത്ര
കഠിനം തന്നെ
എല്ലാം എന്റെ കയ്യിൽ സുഭദ്രം

ഇവിടെ പോസ്റ്റു ചെയ്യുന്ന അഭിപ്രായങ്ങള്‍ ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്‍ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്‍ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്‌ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്‍ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.