വായനയെ അര്‍ത്ഥപൂര്‍ണ്ണമാക്കുന്ന ഗ്രന്ഥം

Web Desk
Posted on July 21, 2019, 9:15 am

സുജയ് ഡി വ്യാസന്‍

ആത്മീയ വിജ്ഞാനത്തിന്റെ അപാരതയിലേക്ക് കൊണ്ടെത്തിക്കുന്ന പഠനവ്യാഖ്യാനമാണ് വിശ്വകുമാര്‍ കൃഷ്ണജീവനം എഴുതിയ ‘ആത്മോപദേശശതകം ഒരു ഉപനിഷദ് ദര്‍പ്പണം’ എന്ന ഗ്രന്ഥം. ഗുരുദേവഗീതയായ ആത്മോപദേശശതകത്തെ ഉപനിഷത്തുകളുടെ ഗഹനതത്വങ്ങളുമായി സാമ്യപ്പെടുത്തുന്ന ഗവേഷണതൃഷ്ണ എഴുത്തുകാരന്‍ ബോധ്യപ്പെടുത്തി തരുന്നു.

മതാതീതദര്‍ശനത്തിന്റെ മധുരാനുഭൂതിയാണ് ആത്മോപദേശകശതകം. ഉപനിഷത്തുക്കളില്‍ മുഴങ്ങി കേള്‍ക്കുന്ന മാനവികതയുടേയും ഏകത്വത്തിന്റേയും സര്‍വ്വ ലക്ഷണങ്ങളും പരസ്പരം സംഗമിക്കുന്നു. ആത്മീയ ജിജ്ഞാസുക്കള്‍ക്ക് പഠിച്ച് മനനം ചെയ്യാവുന്ന പാകത്തിനാണ് ഈ ഗ്രന്ഥം ഭാഷകൊണ്ട് പരുവപ്പെടുത്തിയിരിക്കുന്നത്.

നീലവാനിലൂടെ സ്വച്ഛന്ദം പറന്നു നീങ്ങുന്ന ഒരു പക്ഷിയുടെ ശാന്തതയോടെ വേണം ഗ്രന്ഥം കൈയ്യിലെടുക്കേണ്ടത്. ഗുരുദേവനെ സംബന്ധിക്കുന്ന പലപഠന ഗന്ഥങ്ങള്‍ ഉണ്ടെങ്കിലും ഉപനിഷദ് ദര്‍പ്പണത്തിലൂടെ ഗുരുദര്‍ശനത്തെ സൂചികാഗ്ര സൂക്ഷമതയോടെ സൃഷ്ടിച്ചെടുത്ത മറ്റൊരു ഗ്രന്ഥം ഉണ്ടോ എന്നുള്ള കാര്യം സംശയമാണ്. അതുതന്നെയാണ് ഗ്രന്ഥത്തെ ശ്രദ്ധേയമാക്കുന്നതും. ഒറ്റയിരുപ്പിന് വായിച്ചു പോകാവുന്ന ഒരു പുസ്തകമായി കാണാന്‍ ശ്രമിച്ചാല്‍ അബദ്ധമാകും. ഏകാഗ്രതയും, ക്ഷമയും ഉണ്ടെങ്കില്‍ ഈ ഗ്രന്ഥം നല്‍കുന്ന വായനാനുഭവം അനുഭൂതി സാന്ദ്രമാണ്.

ദശോപനിഷത്തുകള്‍ക്കു പുറമെ പ്രധാനപ്പെട്ട മറ്റ് ഉപനിഷത്തുക്കള്‍, ഷഡ്ദര്‍ശനങ്ങള്‍, പ്രസ്ഥാനത്രയങ്ങള്‍, ശങ്കരദര്‍ശനം, യോഗവാസിഷ്ഠം തുടങ്ങി ഭാരതീയ വൈജ്ഞാനശാഖയിലെ ഒട്ടുമിക്ക ദര്‍ശന സ്വരങ്ങളും ഗ്രന്ഥത്തിന്റെ പല ഭാഗങ്ങളിലും അലകളായി മാറുന്നു. ഗുരുവിന്റെ ചിന്തകളുമായി ഈ അലകള്‍ എങ്ങനെയാണ് ത്രിവേണി സംഗമം തീര്‍ക്കുന്നത് എന്ന് നെടുനാളത്തെ ഗവേഷണത്വര കൊണ്ട് എഴുത്തുകാരന്‍ കൃതിയിലൂടെ ചൂണ്ടികാണിക്കുന്നു. വായനക്കാരന് വിജ്ഞാനവിശപ്പൊന്നുണ്ടെങ്കില്‍ അത് അകറ്റാനുള്ള അക്ഷയപാത്രമാണ് വിശ്വകുമാര്‍ കൃഷ്ണജീവനം രചിച്ച ‘ആത്മോപദേശകശതകം ഒരു ഉപനിഷദ് ദര്‍പ്പണം.’
ആത്മോപദേശശതകത്തിലെ ഓരോ ശ്ലോകങ്ങളേയും അടര്‍ത്തിയെടുത്ത് അതിന്റെ ഭൗതികവും ആത്മീയവുമായ ലക്ഷണസ്വരൂപത്തെ ഉപനിഷദ് ദൃഷ്ടിയിലൂടെ വ്യാഖ്യാനിക്കാന്‍ ശ്രമിച്ചതിന്റെ ഔചിത്യബോധമാണ് ഗ്രന്ഥത്തിന്റെ മറ്റൊരു പ്രത്യേകത.

ആത്മോപദേശശതകത്തിലെ എല്ലാ ശ്ലോകങ്ങളും പരസ്പരബന്ധിതങ്ങളാണ്. എങ്കില്‍ പോലും ഗുരുദേവ കൃതിയിലെ പ്രഥമ നാല് ശ്ലോകങ്ങള്‍ ഏറ്റവും സുപ്രധാനമെന്നാണ് ഗ്രന്ഥകാരന്‍ വിവക്ഷിക്കുന്നത്. അതിനു വേണ്ടി നിരവധി പുറങ്ങളാണ് ഗ്രന്ഥകാരന്‍ മാറ്റിവെച്ചിരിക്കുന്നത്.

‘അറിവിലുമേറി അറിഞ്ഞിടുന്നവന്‍ തന്‍-
ഉരുവിലുമൊത്ത് പുറത്തും ഉജ്ജ്വലിക്കും,
കരുവിന് കണ്ണുകള്‍ അഞ്ചും ഉള്ളടക്കി
തെരുതെരെ വീണ് വണങ്ങി ഓതിടേണം.’
എന്ന നാലുവരി ശ്ലോകത്തിലാണ് ബാക്കിയുള്ള 96 ശ്ലോകങ്ങളും ഉദ്ഫുല്ലമാകുന്നതെന്നാണ് ഗ്രന്ഥകാരന്‍ വാദിക്കുന്നത്. പുസ്തകവായന പൂര്‍ണ്ണമാകുമ്പോള്‍ വായനകാരനും ഇതേ ചിന്തയില്‍ നിലയുറപ്പിക്കുന്നു എന്നുള്ളതാണ് മറ്റൊരു സവിശേഷത.
ഉയര്‍ന്ന ബോധതലത്തില്‍ നിന്നുമുള്ള മനസ്സിന്റെ സ്വകാര്യയാത്രയാണ് വായന. വിജ്ഞാനത്തിന്റെ ഭാസുരതീരം തേടാന്‍ ആഗ്രഹിക്കുന്നവര്‍ക്കും, ഗവേഷണകുതുകികള്‍ക്കും, പഠനതല്‍പ്പരര്‍ക്കും ഒരുപോലെ ഗുണം ചെയ്യുന്ന ഗ്രന്ഥം എന്ന നിലയില്‍ ഈ കൃതി സ്വീകരിക്കപ്പെടുന്ന കാലം വിദൂരമല്ല. എസ് രമേശന്‍ നായരുടെ പ്രൗഢമായ അവതാരിക ഗ്രന്ഥത്തിന് മാറ്റ് കൂട്ടുന്നു. കൃഷ്ണജീവനം പബ്‌ളിക്കേഷന്‍സാണ് ഈ പുസ്തകം പ്രസിദ്ധീകരിച്ചിരിക്കുന്നത്.