ജനുവരിയിൽ കോഴിക്കോട് നടന്ന സംസ്ഥാന സ്കൂൾ കലോത്സവത്തിൽ മലയാളം കവിതാരചനാ മത്സരത്തിൽ മാറ്റുരച്ച പ്രതിഭകളുടെ കവിതകൾ ഉൾപ്പെടുത്തി പുസ്തകം പ്രസിദ്ധീകരിക്കുന്നു. കോഴിക്കോട് കേന്ദ്രമായി പ്രവർത്തിക്കുന്ന ദേശീയ കലാസാഹിതി ട്രസ്റ്റ് എന്ന അധ്യാപക കൂട്ടായ്മയാണ് കലോത്സവ കവിതകൾ എന്ന പേരിൽ സമാഹാരം പുറത്തിറക്കുന്നത്. സംസ്ഥാന സ്ക്കൂൾ കലോത്സവത്തിൽ 14 ജില്ലകളിൽ നിന്ന് ഹൈസ്കൂൾ, ഹയർ സെക്കന്ഡറി തലങ്ങളിൽ മലയാളം കവിതാരചനാ മത്സരത്തിൽ പങ്കെടുത്ത 28 വിദ്യാർത്ഥികളുടെ കവിതകളാണ് സമാഹാരത്തിലുളളത്. കവിതാരചനയിൽ 28 മത്സരാർത്ഥികൾക്കും എ ഗ്രേഡ് ലഭിച്ചിരുന്നു. ഈ 28 ബാല കവികളിൽ 27 പേരും പെൺകുട്ടികളാണെന്ന പ്രത്യേകതയുമുണ്ട്. ഹയർ സെക്കന്ഡറി വിഭാഗത്തിൽ മലപ്പുറം ജില്ലയെ പ്രതിനിധീകരിച്ച് പങ്കെടുത്ത എം കെ അഷീഖ് മർജാനാണ് ഏക ആൺകുട്ടി.
ഇംഗ്ലീഷ്, മലയാളം ഭാഷകളിൽ നോവൽ, കഥ, കവിത വിഭാഗങ്ങളിലായി പതിനഞ്ചോളം പുസ്തകങ്ങൾ പ്രസിദ്ധീകരിച്ച ബാലസാഹിത്യകാരി സിനാഷയുടെ കവിതയും സമാഹാരത്തിലുണ്ട്. കവി പി കെ ഗോപിയാണ് അവതാരിക എഴുതിയിട്ടുള്ളത്. അരിക്കുളം കെപിഎംഎസ്എം ഹയർസെക്കന്ഡറി സ്ക്കൂൾ റിട്ട. പ്രിൻസിപ്പലായിരുന്ന സതീഷ് ബാബു പൊയിൽ ആണ് എഡിറ്റർ. പ്രകാശനം ഈ മാസം 25 ന് തൃശൂർ കേരള സാഹിത്യ അക്കാദമിയിൽ പ്രൊഫ. സി പി അബൂബക്കർ നിർവഹിക്കും. പ്രൊഫ. ജയലക്ഷ്മി ഉണ്ണിത്താൻ ആദ്യ പ്രതി ഏറ്റുവാങ്ങുമെന്ന് ദേശീയ കലാസാഹിതി ട്രസ്റ്റ് സെക്രട്ടറി പൃഥീരാജ് മൊടക്കല്ലൂർ പറഞ്ഞു.
English Summary: Poems of Kalotsava talents become books
You may also like this video
ഇവിടെ പോസ്റ്റു ചെയ്യുന്ന അഭിപ്രായങ്ങള് ജനയുഗം പബ്ലിക്കേഷന്റേതല്ല. അഭിപ്രായങ്ങളുടെ പൂര്ണ ഉത്തരവാദിത്തം പോസ്റ്റ് ചെയ്ത വ്യക്തിക്കായിരിക്കും. കേന്ദ്ര സര്ക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാര്ഹമായ കുറ്റമാണ്. ഇത്തരം അഭിപ്രായ പ്രകടനത്തിന് ഐടി നയപ്രകാരം നിയമനടപടി കൈക്കൊള്ളുന്നതാണ്.