കോണ്‍ഗ്രസില്‍ ഡിസിസി അധ്യക്ഷന്‍മാരെ നാളെ പ്രഖ്യാപിക്കാനിരിക്കെ നേതാക്കള്‍ക്കെതിരായ പോസ്റ്റര്‍ വിപ്ലവം തുടരുന്നു. സംസ്ഥാനത്തെ മിക്ക ഡിസിസി ഓഫീസുകള്‍ക്കു മുമ്പിലും ഗ്രൂപ്പ് തിരിഞ്ഞ് പോസ്റ്ററുകള്‍ പ്രത്യക്ഷപ്പെടുകയാണ്. എം കെ രാഘവൻ എംപിക്കും കെ പ്രവീൺകുമാറിനുമെതിരെ ഇന്ന് കോഴിക്കോട് ഡിസിസി ഓഫീസിന് മുന്നിൽ എ ഗ്രൂപ്പുകാര്‍ പോസ്റ്റർ പതിച്ച് പ്രതിഷേധിച്ചു. കെ പ്രവീൺ കുമാറിനെ ഡിസിസി പ്രസിഡന്റാക്കാനുള്ള നീക്കത്തിനെതിരെയാണ് സേവ് കോൺഗ്രസ് എന്ന പേരിൽ പോസ്റ്റർ പതിച്ചിരിക്കുന്നത്.

അഴിമതി വീരനെയല്ല സത്യസന്ധനായ പ്രസിഡന്റിനെയാണ് കോഴിക്കോട്ടെ കോൺഗ്രസ് പ്രവർത്തകർക്ക് വേണ്ടതെന്നും, എം കെ രാഘവന്റെ നീരാളിപ്പിടിത്തത്തിൽ നിന്ന് കോൺഗ്രസിനെ രക്ഷിക്കണമെന്നും പോസ്റ്ററിൽ പറയുന്നു. എ ഗ്രൂപ്പിന്റെ കൈവശമുള്ള ജില്ലയാണ് കോഴിക്കോട്. തിരുവനന്തപുരത്തും കൊച്ചിയിലും തങ്ങൾക്ക് അവസരം നൽകാത്ത സാഹചര്യത്തിൽ കോഴിക്കോട് കിട്ടിയേ തീരൂവെന്നാണ് എ ഗ്രൂപ്പിന്റെ അവകാശവാദം. എന്നാൽ ഇവർക്ക് ഉയർത്തിക്കാട്ടാൻ മികച്ച നേതാവില്ലെന്നതാണ് വലിയ വെല്ലുവിളി. ഐ ഗ്രൂപ്പ് നേതാവായ പ്രവീൺ കുമാറിനെ കെ മുരളീധരൻ എംപിയാണ് നിർദ്ദേശിച്ചത്.

അതേസമയം ഗ്രൂപ്പ് തർക്കങ്ങൾ കടുത്തതോടെ കടുത്ത വിമർശനവുമായി കെ സുധാകരനും രംഗത്തെത്തിയിട്ടുണ്ട്.

English summary: poster against M K rakhavan and k praveenkumar