ലാമിനേറ്റഡ് ഡ്രൈവിങ് ലൈസൻസുകളിൽ നിന്ന് പെറ്റ് ജി കാർഡുകളിലേക്ക് മാറിയതോടെ മോട്ടോർ വാഹന വകുപ്പിൽ ലഭിക്കുന്ന അപേക്ഷകളിൽ മാർച്ച് മാസത്തെ അപേക്ഷിച്ച് മൂന്നിരട്ടിയോളം വർധനവ്. ലൈസൻസ് പുതുക്കുന്നതിന് പുറമേ പഴയ ലൈസൻസുകൾ പുതിയ രീതിയിലേക്ക് മാറ്റുന്നതിനുള്ള അപേക്ഷകളും ക്രമാതീതമായതോടെ വിതരണത്തിലും കാലതാമസമുണ്ടാകുന്നു. പരമാവധി അഞ്ച് ദിവസത്തില്‍ തപാലില്‍ ലഭ്യമാകുമായിരുന്ന ലൈസൻസ് നിലവിൽ കുറഞ്ഞത് 20 ദിവസത്തിന് ശേഷമാണ് ലഭ്യമാകുന്നത്. ആർടി ഓഫീസുകളിൽ നേരിട്ട് ചെല്ലാതെ ഓൺലൈൻ വഴിയാണ് അപേക്ഷകൾ സ്വീകരിക്കുന്നത് എന്നതിനാൽ സൗകര്യപ്രദമായ സമയങ്ങളിൽ അപേക്ഷ നൽകാൻ കഴിയുതാണ് എണ്ണത്തിൽ വലിയവർധനവുണ്ടാകാൻ കാരണം. ഏപ്രിൽ അവസാന വാരത്തോടെയാണ് ലൈസൻസുകൾ പെറ്റ് ജി കാർഡിലേക്ക് മാറ്റാനുള്ള അപേക്ഷ സ്വീകരിച്ച് തുടങ്ങിയത്.

സംസ്ഥാനത്ത് പ്രതിമാസം ശരാശരി ഒന്നരലക്ഷത്തോളം ലൈസൻസുകളാണ് പുതുക്കി നൽകുന്നത്. ഏകദേശം ഒരുലക്ഷത്തോളം പുതിയ ലൈസൻസുകൾക്കുള്ള അപേക്ഷകളും ലഭിക്കുന്നുണ്ട്. മേയ് മാസത്തെ കണക്കുകൾ പ്രകാരം ഡ്രൈവിങ് ലൈസൻസുമായി ബന്ധപ്പെട്ട് 4.97 ലക്ഷം അപേക്ഷകളാണ് ലഭിച്ചത്. ലൈസൻസ് പുതുക്കുന്നതിനും പുതിയ രീതിയിലേക്ക് മാറ്റുന്നതിനുമായുള്ള അപേക്ഷയുടെ കണക്ക് മാത്രമാണിത്. 1.3 ലക്ഷം പേരാണ് ലേണേഴ്സ് ലൈസൻസിനായി അപേക്ഷിച്ചിട്ടുള്ളത്. ഇതിൽ 3.25 ലക്ഷം ലൈസൻസുകൾ മാത്രമാണ് ഇതുവരെ പ്രിന്റ് ചെയ്ത് നൽകാനായത്. ബാക്കിയുള്ളവയുടെ നടപടികൾ പുരോഗമിക്കുകയാണെന്ന് അധികൃതർ അറിയിച്ചു.

അപേക്ഷകളിൽ ക്രമാതീതമായ വർധനവുണ്ടായതോടെ നിലവിൽ ഓരോ മോട്ടോർ വാഹന ഇൻസ്പെക്ടർമാരും പ്രതിദിനം തീർപ്പാക്കേണ്ടത് ആയിരത്തിലധികം അപേക്ഷകളാണ്. ഓരോ അപേക്ഷയിലും ശാരീരിക ക്ഷമത, കണ്ണ്, മെഡിക്കൽ സർട്ടിഫിക്കറ്റുകളും ലൈസൻസ് വിവരങ്ങളും സൂക്ഷ്മമായി പരിശോധിക്കേണ്ടതുണ്ട്. ഇക്കാര്യങ്ങള്‍ അതീവ ശ്രദ്ധയോടെ വേണം ചെയ്യേണ്ടത്. ഡ്രൈവിങ് ടെസ്റ്റ്, വാഹന പരിശോധന, ലേണേഴ്സ് പരീക്ഷ എന്നിവയുടെ ചുമതലയും എംവിഐമാർക്കാണ്.